Exod 21:1 וְאִלֵּין דִּינַיָּא דְּתַסְדַּר קֳדָמֵיהוֹן. 
Exod 21:2 אֲרֵי תִּזְבּוֹן עַבְדָּא בַּר יִשְׂרָאֵל שֵׁית שְׁנִין יִפְלַח; וּבִשְׁבִיעֵיתָא--יִפּוֹק לְבַר חוֹרִין מַגָּן. 
Exod 21:3 אִם בִּלְחוֹדוֹהִי יֵיעוֹל בִּלְחוֹדוֹהִי יִפּוֹק; אִם בְּעֵיל אִתְּתָא הוּא וְתִפּוֹק אִתְּתֵיהּ עִמֵּיהּ. 
Exod 21:4 אִם רִבּוֹנֵיהּ יִתֵּין לֵיהּ אִתְּתָא וּתְלִיד לֵיהּ בְּנִין אוֹ בְּנָן--אִתְּתָא וּבְנַהָא תְּהֵי לְרִבּוֹנַהּ וְהוּא יִפּוֹק בִּלְחוֹדוֹהִי. 
Exod 21:5 וְאִם מֵימָר יֵימַר עַבְדָּא רָחֵימְנָא יָת רִבּוֹנִי יָת אִתְּתִי וְיָת בְּנָי; לָא אֶפּוֹק בַּר חוֹרִין. 
Exod 21:6 וִיקָרְבִנֵּיהּ רִבּוֹנֵיהּ לִקְדָם דַּיָּנַיָּא וִיקָרְבִנֵּיהּ לְוָת דַּשָּׁא אוֹ דִּלְוָת מְזוּזְתָא; וְיַרְצַע רִבּוֹנֵיהּ יָת אֻדְנֵיהּ בְּמַרְצְעָא וִיהֵי לֵיהּ עֶבֶד פָּלַח לְעָלַם.  {ס}
Exod 21:7 וַאֲרֵי יְזַבֵּין גְּבַר יָת בְּרַתֵּיהּ לְאַמְהוּ--לָא תִּפּוֹק כְּמַפְּקָנוּת עַבְדַיָּא. 
Exod 21:8 אִם בִּישָׁת בְּעֵינֵי רִבּוֹנַהּ דִּיקַיְּמַהּ לֵיהּ--וְיִפְרְקִנַּהּ:  לִגְבַר אָחֳרָן לֵית לֵיהּ רְשׁוּ לְזַבּוֹנַהּ בְּמִשְׁלְטֵיהּ בַּהּ. 
Exod 21:9 וְאִם לִבְרֵיהּ יְקַיְּמִנַּהּ--כְּהִלְכָּת בְּנָת יִשְׂרָאֵל יַעֲבֵיד לַהּ. 
Exod 21:10 אִם אֻחְרָנְתָא יִסַּב לֵיהּ--זִיּוּנַהּ כְּסוּתַהּ וְעָנְתַהּ לָא יִמְנַע. 
Exod 21:11 וְאִם תְּלָת אִלֵּין--לָא יַעֲבֵיד לַהּ:  וְתִפּוֹק מַגָּן דְּלָא כְּסַף.  {ס}
Exod 21:12 דְּיִמְחֵי לַאֲנָשׁ וְיִקְטְלִנֵּיהּ אִתְקְטָלָא יִתְקְטִיל. 
Exod 21:13 וּדְלָא כְּמַן לֵיהּ וּמִן קֳדָם יְיָ אִתְמְסַר לִידֵיהּ--וַאֲשַׁוֵּי לָךְ אֲתַר דְּיִעְרוֹק לְתַמָּן.  {ס}
Exod 21:14 וַאֲרֵי יַרְשַׁע גְּבַר עַל חַבְרֵיהּ לְמִקְטְלֵיהּ בִּנְכִילוּ--מִן מַדְבְּחִי תִּדְבְּרִנֵּיהּ לְמִקְטַל.  {ס}
Exod 21:15 וּדְיִמְחֵי לַאֲבוּהִי וּלְאִמֵּיהּ אִתְקְטָלָא יִתְקְטִיל.  {ס}
Exod 21:16 וּדְיִגְנוֹב נַפְשָׁא מִבְּנֵי יִשְׂרָאֵל וִיזַבְּנִנֵּיהּ וְיִשְׁתְּכַח בִּידֵיהּ אִתְקְטָלָא יִתְקְטִיל.  {ס}
Exod 21:17 וְדִילוּט לַאֲבוּהִי וּלְאִמֵּיהּ אִתְקְטָלָא יִתְקְטִיל.  {ס}
Exod 21:18 וַאֲרֵי יִנְצוֹן גֻּבְרִין--וְיִמְחֵי גְּבַר יָת חַבְרֵיהּ בְּאַבְנָא אוֹ בְּכֻרְמֵיזָא; וְלָא יְמוּת וְיִפּוֹל לְבֻטְלָן. 
Exod 21:19 אִם יְקוּם וִיהַלֵּיךְ בְּבָרָא עַל בָּרְיֵיהּ--וִיהֵי זָכָא מָחְיָא:  לְחוֹד בֻּטְלָנֵיהּ יִתֵּין וַאֲגַר אַסְיָא יְשַׁלֵּים.  {ס}
Exod 21:20 וַאֲרֵי יִמְחֵי גְּבַר יָת עַבְדֵּיהּ אוֹ יָת אַמְתֵּיהּ בְּשֻׁלְטָן וִימוּת תְּחוֹת יְדֵיהּ--אִתְּדָנָא יִתְּדָן. 
Exod 21:21 בְּרַם אִם יוֹמָא אוֹ תְּרֵין יוֹמִין יִתְקַיַּם--לָא יִתְּדָן אֲרֵי כַּסְפֵּיהּ הוּא.  {ס}
Exod 21:22 וַאֲרֵי יִנְצוֹן גֻּבְרִין וְיִמְחוֹן אִתְּתָא מְעַדְּיָא וְיִפְּקוּן וַלְדַּהָא וְלָא יְהֵי מוֹתָא--אִתְגְּבָאָה יִתְגְּבֵי כְּמָא דִּישַׁוֵּי עֲלוֹהִי בַּעְלַהּ דְּאִתְּתָא וְיִתֵּין מִמֵּימַר דַּיָּנַיָּא. 
Exod 21:23 וְאִם מוֹתָא יְהֵי--וְתִתֵּין נַפְשָׁא חֲלָף נַפְשָׁא. 
Exod 21:24 עֵינָא חֲלָף עֵינָא שִׁנָּא חֲלָף שִׁנָּא יְדָא חֲלָף יְדָא רִגְלָא חֲלָף רִגְלָא. 
Exod 21:25 כְּוַאָה חֲלָף כְּוַאָה פִּדְעָא חֲלָף פִּדְעָא מַשְׁקוֹפִי חֲלָף מַשְׁקוֹפִי.  {ס}
Exod 21:26 וַאֲרֵי יִמְחֵי גְּבַר יָת עֵינָא דְּעַבְדֵּיהּ אוֹ יָת עֵינָא דְּאַמְתֵּיהּ--וִיחַבְּלִנַּהּ:  לְבַר חוֹרִין יִפְטְרִנֵּיהּ חֲלָף עֵינֵיהּ. 
Exod 21:27 וְאִם שִׁנָּא דְּעַבְדֵּיהּ אוֹ שִׁנָּא דְּאַמְתֵּיהּ יַפִּיל--לְבַר חוֹרִין יִפְטְרִנֵּיהּ חֲלָף שִׁנֵּיהּ.  {פ}
Exod 21:28 וַאֲרֵי יִגַּח תּוֹרָא יָת גֻּבְרָא אוֹ יָת אִתְּתָא וִימוּת--אִתְרְגָמָא יִתְרְגֵים תּוֹרָא וְלָא יִתְאֲכִיל יָת בִּסְרֵיהּ וּמָרֵיהּ דְּתוֹרָא יְהֵי זָכָא. 
Exod 21:29 וְאִם תּוֹר נַגָּח הוּא מֵאֶתְמָלִי וּמִדְּקַמּוֹהִי וְאִתַּסְהַד בְּמָרֵיהּ וְלָא נַטְרֵיהּ וְיִקְטוֹל גְּבַר אוֹ אִתָּא--תּוֹרָא יִתְרְגֵים וְאַף מָרֵיהּ יִתְקְטִיל. 
Exod 21:30 אִם מָמוֹן יְשַׁוּוֹן עֲלוֹהִי--וְיִתֵּין פֻּרְקַן נַפְשֵׁיהּ כְּכֹל דִּישַׁוּוֹן עֲלוֹהִי. 
Exod 21:31 אוֹ לְבַר יִשְׂרָאֵל יִגַּח תּוֹרָא אוֹ לְבַת יִשְׂרָאֵל יִגַּח--כְּדִינָא הָדֵין יִתְעֲבֵיד לֵיהּ. 
Exod 21:32 אִם לְעַבְדָּא יִגַּח תּוֹרָא אוֹ לְאַמְתָּא--כַּסְפָּא תְּלָתִין סִלְעִין יִתֵּין לְרִבּוֹנֵיהּ וְתוֹרָא יִתְרְגֵים.  {ס}
Exod 21:33 וַאֲרֵי יִפְתַּח גְּבַר גּוּב אוֹ אֲרֵי יִכְרֵי גְּבַר גּוּב--וְלָא יְכַסֵּינֵיהּ; וְיִפּוֹל תַּמָּן תּוֹרָא אוֹ חֲמָרָא. 
Exod 21:34 מָרֵיהּ דְּגֻבָּא יְשַׁלֵּים כַּסְפָּא יָתִיב לְמָרוֹהִי; וּמִיתָא יְהֵי דִּילֵיהּ.  {ס}
Exod 21:35 וַאֲרֵי יִגּוֹף תּוֹר דִּגְבַר יָת תּוֹרָא דְּחַבְרֵיהּ וִימוּת--וִיזַבְּנוּן יָת תּוֹרָא חַיָא וְיִפְלְגוּן יָת כַּסְפֵּיהּ וְאַף יָת דְּמֵי מִיתָא יִפְלְגוּן. 
Exod 21:36 אוֹ אִתְיְדַע אֲרֵי תּוֹר נַגָּח הוּא מֵאֶתְמָלִי וּמִדְּקַמּוֹהִי וְלָא נַטְרֵיהּ מָרֵיהּ--שַׁלָּמָא יְשַׁלֵּים תּוֹרָא חֲלָף תּוֹרָא וּמִיתָא יְהֵי דִּילֵיהּ.  {ס}