Exod 22:1 אִם בְּמַחְתַּרְתָּא יִשְׁתְּכַח גַּנָּבָא וְיִתְמְחֵי וִימוּת--לֵית לֵיהּ דַּם. 
Exod 22:2 אִם עֵינָא דְּסָהֲדַיָּא נְפַלַת עֲלוֹהִי דְּמָא לֵיהּ:  שַׁלָּמָא יְשַׁלֵּים--אִם לֵית לֵיהּ וְיִזְדַּבַּן בִּגְנֻבְתֵּיהּ. 
Exod 22:3 אִם אִשְׁתְּכָחָא תִּשְׁתְּכַח בִּידֵיהּ גְּנֻבְתָּא מִתּוֹר עַד חֲמָר עַד אִמַּר--אִנּוּן חַיִּין:  עַל חַד תְּרֵין יְשַׁלֵּים.  {ס}
Exod 22:4 אֲרֵי יוֹכֵיל גְּבַר חֲקַל אוֹ כְּרַם וִישַׁלַּח יָת בְּעִירֵיהּ וְיֵיכוֹל בַּחֲקַל אָחֳרָן--שְׁפַר חַקְלֵיהּ וּשְׁפַר כַּרְמֵיהּ יְשַׁלֵּים.  {ס}
Exod 22:5 אֲרֵי יִתַּפַּק נוּר וְיַשְׁכַּח כֻּבִּין וְיֵיכוֹל גְּדִישִׁין אוֹ קָמָא אוֹ חֲקַל--שַׁלָּמָא יְשַׁלֵּים דְּאַדְלֵיק יָת דְּלֵיקְתָא.  {ס}
Exod 22:6 אֲרֵי יִתֵּין גְּבַר לְחַבְרֵיהּ כְּסַף אוֹ מָנִין לְמִטַּר וְיִתְגַּנְּבוּן מִבֵּית גֻּבְרָא--אִם יִשְׁתְּכַח גַּנָּבָא יְשַׁלֵּים עַל חַד תְּרֵין. 
Exod 22:7 אִם לָא יִשְׁתְּכַח גַּנָּבָא וְיִתְקָרַב מָרֵיהּ דְּבֵיתָא לִקְדָם דַּיָּנַיָּא:  אִם לָא אוֹשֵׁיט יְדֵיהּ בְּמָא דִּמְסַר לֵיהּ חַבְרֵיהּ. 
Exod 22:8 עַל כָּל פִּתְגָם דְּחוֹב עַל תּוֹר עַל חֲמָר עַל אִמַּר עַל כְּסוּ עַל כָּל אֲבֵידְתָא דְּיֵימַר אֲרֵי הוּא דֵּין--לִקְדָם דַּיָּנַיָּא יֵיעוֹל דִּין תַּרְוֵיהוֹן:  דִּיחַיְּבוּן דַּיָּנַיָּא יְשַׁלֵּים עַל חַד תְּרֵין לְחַבְרֵיהּ.  {ס}
Exod 22:9 אֲרֵי יִתֵּין גְּבַר לְחַבְרֵיהּ חֲמָר אוֹ תּוֹר אוֹ אִמַּר וְכָל בְּעִירָא--לְמִטַּר; וּמִית אוֹ אִתְּבַר אוֹ אִשְׁתְּבִי לֵית דְּחָזֵי. 
Exod 22:10 מוֹמָתָא דַּייָ תְּהֵי בֵּין תַּרְוֵיהוֹן--אִם לָא אוֹשֵׁיט יְדֵיהּ בְּמָא דִּמְסַר לֵיהּ חַבְרֵיהּ; וִיקַבֵּיל מָרֵיהּ מִנֵּיהּ מוֹמָתָא וְלָא יְשַׁלֵּים. 
Exod 22:11 וְאִם אִתְגְּנָבָא יִתְגְּנֵיב מֵעִמֵּיהּ--יְשַׁלֵּים לְמָרוֹהִי. 
Exod 22:12 אִם אִתְּבָרָא יִתְּבַר יַיְתֵי סָהֲדִין:  דִּתְבִיר לָא יְשַׁלֵּים.  {פ}
Exod 22:13 וַאֲרֵי יִשְׁאַל גְּבַר מִן חַבְרֵיהּ וְיִתְּבַר אוֹ יְמוּת; מָרֵיהּ לֵית עִמֵּיהּ שַׁלָּמָא יְשַׁלֵּים. 
Exod 22:14 אִם מָרֵיהּ עִמֵּיהּ לָא יְשַׁלֵּים:  אִם אֲגִירָא הוּא עָאל בְּאַגְרֵיהּ.  {ס}
Exod 22:15 וַאֲרֵי יְשַׁדֵּיל גְּבַר בְּתוּלְתָא דְּלָא מְאָרְסָא--וְיִשְׁכּוֹב עִמַּהּ:  קַיָּמָא יְקַיְּמִנַּהּ לֵיהּ לְאִתּוּ. 
Exod 22:16 אִם מִצְבָּא לָא יִצְבֵּי אֲבוּהָא לְמִתְּנַהּ לֵיהּ--כַּסְפָּא יִתְקוּל כְּמֻהְרֵי בְּתוּלָתָא.  {ס}
Exod 22:17 חָרָשָׁא לָא תַּחֵי. 
Exod 22:18 כָּל דְּיִשְׁכּוֹב עִם בְּעִירָא אִתְקְטָלָא יִתְקְטִיל.  {ס}
Exod 22:19 דִּידַבַּח לְטָעֲוָת עַמְמַיָּא יִתְקְטִיל--אֱלָהֵין לִשְׁמָא דַּייָ בִּלְחוֹדוֹהִי. 
Exod 22:20 וּלְגִיּוֹרָא לָא תּוֹנוֹן וְלָא תָּעִיקוּן:  אֲרֵי דַּיָּרִין הֲוֵיתוֹן בְּאַרְעָא דְּמִצְרָיִם. 
Exod 22:21 כָּל אַרְמְלָא וְיִיתַם לָא תְּעַנּוֹן. 
Exod 22:22 אִם עַנָּאָה תְּעַנֵּי יָתֵיהּ--אֲרֵי אִם מִקְבָּל יִקְבַּל קֳדָמַי קַבָּלָא אֲקַבֵּיל קְבִילְתֵיהּ. 
Exod 22:23 וְיִתְקַף רֻגְזִי וְאֶקְטוֹל יָתְכוֹן בְּחַרְבָּא; וְיִהְוְיָן נְשֵׁיכוֹן אַרְמְלָן וּבְנֵיכוֹן יַתְמִין.  {פ}
Exod 22:24 אִם כַּסְפָּא תּוֹזֵיף בְּעַמִּי לְעַנְיָא דְּעִמָּךְ--לָא תְּהֵי לֵיהּ כְּרָשְׁיָא; לָא תְּשַׁוּוֹן עֲלוֹהִי חִיבֻלְיָא. 
Exod 22:25 אִם מִשְׁכּוֹנָא תִּסַּב כְּסוּתָא דְּחַבְרָךְ--עַד מֵיעַל שִׁמְשָׁא תָּתִיבִנֵּיהּ לֵיהּ. 
Exod 22:26 אֲרֵי הִיא כְּסוּתֵיהּ בִּלְחוֹדַהּ הִיא תֻּתְבֵּיהּ לְמַשְׁכֵּיהּ; בְּמָא יִשְׁכּוֹב--וִיהֵי אֲרֵי יִקְבַּל קֳדָמַי וַאֲקַבֵּיל קְבִילְתֵיהּ אֲרֵי חַנָּנָא אֲנָא.  {ס}
Exod 22:27 דַּיָּנָא לָא תַּקִיל; וְרַבָּא בְּעַמָּךְ לָא תְּלוּט. 
Exod 22:28 בִּכּוּרָךְ וְדִמְעָךְ לָא תְּאַחַר; בֻּכְרָא דִּבְנָךְ תַּפְרֵישׁ קֳדָמָי. 
Exod 22:29 כֵּין תַּעֲבֵיד לְתוֹרָךְ לְעָנָךְ:  שִׁבְעָא יוֹמִין יְהֵי עִם אִמֵּיהּ בְּיוֹמָא תְּמִינָאָה תַּפְרְשִׁנֵּיהּ קֳדָמָי. 
Exod 22:30 וַאֲנָשִׁין קַדִּישִׁין תְּהוֹן קֳדָמָי; וּבְסַר תְּלִישׁ מִן חֵיוָא חַיָא לָא תֵּיכְלוּן לְכַלְבָּא תִּרְמוֹן יָתֵיהּ.  {ס}
Exod 22:31 - - -