Exod 23:1 לָא תְּקַבֵּיל שֵׁימַע דִּשְׁקַר; לָא תְּשַׁוֵּי יְדָךְ עִם חַיָּבָא לְמִהְוֵי לֵיהּ סָהִיד שַׁקָּר. 
Exod 23:2 לָא תְּהֵי בָּתַר סַגִּיאֵי לְאַבְאָשָׁא; וְלָא תִּתְמְנַע מִלְּאַלָּפָא מָא דִּבְעֵינָךְ עַל דִּינָא בָּתַר סַגִּיאֵי--שַׁלֵּים דִּינָא. 
Exod 23:3 וְעַל מִסְכֵּינָא לָא תְּרַחֵים בְּדִינֵיהּ.  {ס}
Exod 23:4 אֲרֵי תְּעָרַע תּוֹרָא דְּסָנְאָךְ אוֹ חֲמָרֵיהּ--דְּטָעֵי:  אָתָבָא תָּתִיבִנֵּיהּ לֵיהּ.  {ס}
Exod 23:5 אֲרֵי תִּחְזֵי חֲמָרָא דְּסָנְאָךְ רְבִיעַ תְּחוֹת טֻעְנֵיהּ וְתִתְמְנַע מִלְּמִשְׁקַל לֵיהּ--מִשְׁבָּק תִּשְׁבּוֹק מָא דִּבְלִבָּךְ עֲלוֹהִי וּתְפָרֵיק עִמֵּיהּ.  {ס}
Exod 23:6 לָא תַּצְלֵי דִּין מִסְכֵּינָךְ בְּדִינֵיהּ. 
Exod 23:7 מִפִּתְגָמָא דְּשִׁקְרָא הֱוִי רַחִיק; וְדִזְכֵּי וְדִנְפַק דְּכֵי מִן דִּינָא לָא תִּקְטוּל אֲרֵי לָא אֲזַכֵּי חַיָּבָא. 
Exod 23:8 וְשֻׁחְדָּא לָא תְּקַבֵּיל:  אֲרֵי שֻׁחְדָּא מְעַוַּר עֵינֵי חַכִּימִין וּמְקַלְקֵיל פִּתְגָמִין תְּרִיצִין. 
Exod 23:9 וּלְגִיּוֹרָא לָא תָּעִיקוּן; וְאַתּוּן יְדַעְתּוּן יָת נַפְשָׁא דְּגִיּוֹרָא--אֲרֵי דַּיָּרִין הֲוֵיתוֹן בְּאַרְעָא דְּמִצְרָיִם. 
Exod 23:10 וְשֵׁית שְׁנִין תִּזְרַע יָת אַרְעָךְ; וְתִכְנוֹשׁ יָת עֲלַלְתַּהּ. 
Exod 23:11 וּשְׁבִיעֵיתָא תִּשְׁמְטִנַּהּ וְתִרְטְשִׁנַּהּ וְיֵיכְלוּן מִסְכֵּינֵי עַמָּךְ וּשְׁאָרְהוֹן תֵּיכוֹל חַיַּת בָּרָא; כֵּין תַּעֲבֵיד לְכַרְמָךְ לְזֵיתָךְ. 
Exod 23:12 שִׁתָּא יוֹמִין תַּעֲבֵיד עוּבָדָךְ וּבְיוֹמָא שְׁבִיעָאָה תְּנוּחַ--בְּדִיל דִּינוּחַ תּוֹרָךְ וּחְמָרָךְ וְיִשְׁקוֹט בַּר אַמְתָּךְ וְגִיּוֹרָא. 
Exod 23:13 וּבְכֹל דַּאֲמַרִית לְכוֹן תִּסְתַּמְרוּן; וְשׁוֹם טָעֲוָת עַמְמַיָּא לָא תִּדְכְרוּן לָא יִשְׁתְּמַע עַל פֻּמְּכוֹן. 
Exod 23:14 תְּלָת זִמְנִין תֵּיחֲגוּן קֳדָמַי בְּשַׁתָּא. 
Exod 23:15 יָת חַגָּא דְּפַטִּירַיָּא תִּטַּר--שִׁבְעָא יוֹמִין תֵּיכוֹל פַּטִּירָא כְּמָא דְּפַקֵּידְתָּךְ לִזְמַן יַרְחָא דַּאֲבִיבָא אֲרֵי בֵּיהּ נְפַקְתָּא מִמִּצְרָיִם; וְלָא יִתַּחְזוֹן קֳדָמַי רֵיקָנִין. 
Exod 23:16 וְחַגָּא דִּחְצָדָא בִּכּוּרֵי עוּבָדָךְ דְּתִזְרַע בְּחַקְלָא; וְחַגָּא דִּכְנָשָׁא בְּמִפְּקַהּ דְּשַׁתָּא בְּמִכְנְשָׁךְ יָת עוּבָדָךְ מִן חַקְלָא. 
Exod 23:17 תְּלָת זִמְנִין בְּשַׁתָּא--יִתַּחְזוֹן כָּל דְּכוּרָךְ קֳדָם רִבּוֹן עָלְמָא יְיָ. 
Exod 23:18 לָא תִּכּוֹס עַל חֲמִיעַ דַּם פִּסְחִי; וְלָא יְבִיתוּן בָּר מִמַּדְבְּחָא תַּרְבֵּי נִכְסַת חַגָּא עַד צַפְרָא. 
Exod 23:19 רֵישׁ בִּכּוּרֵי אַרְעָךְ תַּיְתֵי לְבֵית מַקְדְּשָׁא דַּייָ אֱלָהָךְ; לָא תֵּיכְלוּן בְּסַר בַּחֲלַב.  {פ}
Exod 23:20 הָא אֲנָא שָׁלַח מַלְאֲכָא קֳדָמָךְ לְמִטְּרָךְ בְּאוֹרְחָא; וּלְאַעָלוּתָךְ לְאַתְרָא דְּאַתְקֵינִית. 
Exod 23:21 אִסְתְּמַר מִן קֳדָמוֹהִי וְקַבֵּיל לְמֵימְרֵיהּ לָא תְּסָרֵיב לְקִבְלֵיהּ:  אֲרֵי לָא יִשְׁבּוֹק לְחוֹבֵיכוֹן אֲרֵי בִּשְׁמִי מֵימְרֵיהּ. 
Exod 23:22 אֲרֵי אִם קַבָּלָא תְּקַבֵּיל לְמֵימְרֵיהּ וְתַעֲבֵיד כֹּל דַּאֲמַלֵּיל--וְאֶסְנֵי יָת סָנְאָךְ וְאַעִיק לְדִמְעִיקִין לָךְ. 
Exod 23:23 אֲרֵי יְהָךְ מַלְאֲכִי קֳדָמָךְ וְיַעֵילִנָּךְ לְוָת אֱמוֹרָאֵי וְחִתָּאֵי וּפְרִזָּאֵי וּכְנַעֲנָאֵי חִוָּאֵי וִיבוּסָאֵי; וַאֲשֵׁיצֵינוּן. 
Exod 23:24 לָא תִּסְגּוֹד לְטָעֲוָתְהוֹן וְלָא תִּפְלְחִנִּין וְלָא תַּעֲבֵיד כְּעוּבָדֵיהוֹן:  אֲרֵי פַּגָּרָא תְּפַגְּרִנּוּן וְתַבָּרָא תְּתַבַּר קָמָתְהוֹן. 
Exod 23:25 וְתִפְלְחוּן קֳדָם יְיָ אֱלָהֲכוֹן וִיבָרֵיךְ יָת מֵיכְלָךְ וְיָת מִשְׁתְּיָךְ; וְאַעְדֵּי מַרְעִין בִּישִׁין מִבֵּינָךְ.  {ס}
Exod 23:26 לָא תְּהֵי תָּכְלָא וְעַקְרָא בְּאַרְעָךְ; יָת מִנְיַן יוֹמָךְ אַשְׁלֵים. 
Exod 23:27 יָת אֵימְתִי אֲשַׁלַּח קֳדָמָךְ וַאֲשַׁגֵּישׁ יָת כָּל עַמָּא דְּאַתְּ אָתֵי לְאָגָחָא קְרָבָא בְּהוֹן; וְאֶמְסַר יָת כָּל בַּעֲלֵי דְּבָבָךְ קֳדָמָךְ מַחְזְרֵי קְדָל. 
Exod 23:28 וְאֶשְׁלַח יָת עָרָעִיתָא קֳדָמָךְ; וּתְתָרֵיךְ יָת חִוָּאֵי יָת כְּנַעֲנָאֵי וְיָת חִתָּאֵי--מִן קֳדָמָךְ. 
Exod 23:29 לָא אֲתָרֵיכִנּוּן מִן קֳדָמָךְ בְּשַׁתָּא חֲדָא:  דִּלְמָא תְּהֵי אַרְעָא צָדְיָא וְתִסְגֵּי עֲלָךְ חַיַּת בָּרָא. 
Exod 23:30 זְעֵיר זְעֵיר אֲתָרֵיכִנּוּן מִן קֳדָמָךְ עַד דְּתִסְגֵּי וְתַחְסֵין יָת אַרְעָא. 
Exod 23:31 וַאֲשַׁוֵּי יָת תְּחוּמָךְ מִיַּמָּא דְּסוּף וְעַד יַמָּא דִּפְלִשְׁתָּאֵי וּמִמַּדְבְּרָא עַד פְּרָת:  אֲרֵי אֶמְסַר בְּיַדְכוֹן יָת יָתְבֵי אַרְעָא וּתְתָרֵיכִנּוּן מִן קֳדָמָךְ. 
Exod 23:32 לָא תִּגְזַר לְהוֹן וּלְטָעֲוָתְהוֹן קְיָם. 
Exod 23:33 לָא יִתְּבוּן בְּאַרְעָךְ דִּלְמָא יְחַיְּבוּן יָתָךְ קֳדָמָי:  אֲרֵי תִּפְלַח יָת טָעֲוָתְהוֹן אֲרֵי יְהוֹן לָךְ לְתַקְלָא.  {פ}