1Chr 16:1 ואיתיאו ית ארונא דה׳ ואקימו יתיה במצע משכנא די פרש ליה דוד וקריבו עלוון ונכסת קודשין קדם ה׳׃
1Chr 16:2 ופסק דוד מן למסק עלתא ונכסת קודשי׳ ובריך ית עמא בשום מימרא דה׳׃
1Chr 16:3 ופליג לכל אנש ישר׳ מגבר ועד אתתא לכל חד טולמא דלחמא חדא ופלוג חד מן אשתה בתורא ומנא חד מן אשתה בהינא דחמרא׃
1Chr 16:4 ומני קדם ארונא דה׳ מן ליואי משבחיא ולאדכרא ולאודויי ולשבוחי קדם ה׳ אלהא דישראל׃
1Chr 16:5 אסף ברישא ותנייניה זכריה יעיא׳ ושמירמו׳ ויחיאל ומתתיהו ואליאב ובניהו ועבד אדום ויעיאל בזיני זמר נבלין וכנרין ואסף בצלצלין משמע׃
1Chr 16:6 ובניהו ויחזיאל כהניא בחצוצרתא תדירא קדם ארון קיימא דה׳׃
1Chr 16:7 ביומא ההוא הא בכין אתמנא דוד ברישא לשבחא קדם ה׳ בידא דאסף ואחוהי׃
1Chr 16:8 שבחו קדם ה׳ קרו בשמיה הודעו בעמיא עובדוי׃
1Chr 16:9 שבחו קדמוי זמרו קדמוי מלילו כולהון פרישוותיה׃
1Chr 16:10 אשתבחון בשום קודשיה יחדי לבהון דתבעי מימרא דה׳׃
1Chr 16:11 תבעו מימרא דה׳ ותוקפיה קבילו אפוהי תדירא׃
1Chr 16:12 אדכרו פרישוותיה דעבד תמהוהי ודיני פומיה׃
1Chr 16:13 זרעא דישר׳ עבדיה בני יעקב דאתרעי בהון׃
1Chr 16:14 הוא ה׳ אלהנא בכולא ארע׳ דינוהי׃
1Chr 16:15 אדכרו לעלם קיימיה פתגמא דפקיד לאלפין דרין׃
1Chr 16:16 די גזר עם אברהם וקיימיה ליצחק׃
1Chr 16:17 ואוקמה ליעק׳ לגזירא ולישראל קיים עלם׃
1Chr 16:18 למימר לך אתן ית ארעא דכנען עדב אחסנתכון׃
1Chr 16:19 כד הויתון עם דמניין קלילין ויתבין בה׃
1Chr 16:20 והליכו מן עמא לות עמא ומן מלכו לעם חורן׃
1Chr 16:21 לא ארשי גבר לטלמא להון ואוכח אמטולהון מלכיא׃
1Chr 16:22 לא תנזקון בקדישי דרביתנון בשום טב ובנביי לא תבאשון׃
1Chr 16:23 שבחו קדם ה׳ כל יתבי ארעא בשרו מן יומא ליומא פורקניה׃
1Chr 16:24 אשתעו בעממיא יקריה בכולהון אומיא פרישוותיה׃
1Chr 16:25 מטול דרב ה׳ ומשבח לחדא ודחיל הוא על כולהון מלאכייה׃
1Chr 16:26 מטול דכלהון טעות עממי׳ דחלן דלית בהון צרוך וה׳ שמיא עבד׃
1Chr 16:27 זיוא ושבהורא קדמוי תוקפא ודיצותא באתריה׃
1Chr 16:28 הבו קדם ה׳ גניסת עממי׳ הבו קדם ה׳ יקרא ותוקפא׃
1Chr 16:29 הבו קדם ה׳ איקר שמיה טולו תקרובתא ועולו קדמוהי וסגודו קדם ה׳ בשבהורי קודשא׃
1Chr 16:30 אזדעזעו מן קדמוהי כל יתבי ארעא ברם אתקין ארעא דלא תזדעזע׃
1Chr 16:31 יחדון אנגלי מרומא ויבועון יתבי ארעא יימרון בעמיא ה׳ מלך׃
1Chr 16:32 יכלי ימא ומלאיה יבועון אילני חקלא וכל עשבא דביה׃
1Chr 16:33 הא בכין ירננו אילני חורשא מן קדם ה׳ ארום אתגלי למדן כל יתבי ארעא׃
1Chr 16:34 אודו קדם ה׳ ארום טב מטול די לעלם טוביה׃
1Chr 16:35 ואמרו פרוק יתנא אלהא פורקננא וכנוש יתנא ושיזיב יתנא מן עממיא לאודויי לשום קודשך ולאשתבחא בתושבחתך׃
1Chr 16:36 בריך ה׳ אלהא דישראל מן עלמא הדין ועד עלמא דאתי ואמרו כל עמא אמן שבחא קדם ה׳׃
1Chr 16:37 ושבק תמן קדם ארון קיימא דה׳ לאסף ולאחוהי לשמשא קדם ארונ׳ תדירא פתגם יום ביומיה׃
1Chr 16:38 ועבד אדום ואחיהון אשתין ותמניה ועבד אדום בר ידותון וחסה לתרעייה׃
1Chr 16:39 וית צדוק כהנא ואחוהי כהניא קדם משכנא דה׳ בבית כנישתא די בגבעון׃
1Chr 16:40 לאסקא עלוון קדם ה׳ על מדבח עלתא תדירא לצפרא ולרמשא ולכל מה דכתיב באוריתא דה׳ די פקיד על ישראל׃
1Chr 16:41 ועמהון הימן וידותון ושייר בחירייה די אתפרשו בשמהן לאודויי קדם ה׳ מטול די לעלם טוביה׃
1Chr 16:42 ועמהון הימן וידותון בחצצרתא וצלצלין למשמעייה וזיני תושבחא קדם ה׳ ובני ידותון ממנן על תרעייה׃
1Chr 16:43 ואזל כל עמא אנש לבייתיה וחזר דוד לברכא ית עמא׃