Targum, 2 Chronicles, Chapter 12

2Chr 12:1 והוה כד אתקנת מלכותיה דרחבעם וכד אתוקף שבק ית אוריתא דייי וכל ישראל עמיה׃
2Chr 12:2 והוה בשתא חמישיתא למלכא רחבעם סליק שישק מלכא דמצרים על ירושלם מטול דשקרו במימרא דייי׃
2Chr 12:3 באלפא ומאתן ארתיכין ובשתין אלפין פרשין ולית סכום לעמא דאתו עמיה ממצרים לובאי וסוכאי וכושאי׃
2Chr 12:4 וכבש ית קרויא כריכתא די דהוו ליהודה ואתא לירושלם׃
2Chr 12:5 ושמעיה נביא אתא לות רחבעם ורבני יהודה דאתכנשו לירושלם מן קדם שישק ואמר להון כדנן אמר ייי אתון שבקתון ית דחלתי וברם אנא אשבוק יתכון בידא דשישק׃
2Chr 12:6 ואתכנעו רבני ישראל ומלכא ואמרו זכאה הוא ייי׃
2Chr 12:7 וכד גלי קדם ייי ארום אתכנעו הוה פתגם נבואה מן קדם ייי עם שמעיה למימר אתכנעו עמי לא אחבלנון ואתן להון כזעיר לשיזבא ולא תחול רוגזי בירושלם בידא דשישק׃
2Chr 12:8 ארום יהוון ליה לעבדין וידעון פולחני ושיעבוד מלכוות ארעתא׃
2Chr 12:9 וסליק שישק למלכא דמצרים על ירושלם ושבא ית תסברי בית מוקדשא דייי וית תסברי בית מלכא וית כל תושבחת רגוגא נסיב ושבא ית תריסי דהבא די עבד שלמה׃
2Chr 12:10 ועבד מלכא רחבעם חלופיהון עגילין דנחשא ומני על יד רבני רהטוניא דנטרין תרע בית מלכא׃
2Chr 12:11 והוה כד עליל מלכא לבית מקדשא דייי עללין רהטוניא ונטלונון ומתיבין יתהון לדוכא דרהטוניא׃
2Chr 12:12 וכד תבר לביה תב מניה רוגזא דייי ולא אמר לחבלא ולשיצאה לכל עמא ואוף בדבית יהודה אמר לאיתאה פתגמין טבין׃
2Chr 12:13 ואתוקף מלכא רחבעם בירושלם ומלך ארום בר ארבעין וחדא שנין הוה כד מלך ושביסרי שנין מלך בירושלם קרתא די אתרעי ייי לאשראה שכנתיה תמן מכל שבטיא דישראל ושום אמיה נעמה עמוניתא׃
2Chr 12:14 ועבד דביש ארום לא כוין לביה למתבע אולפן מן קדם ייי׃
2Chr 12:15 ופתגמי רחבעם קדמאי ובתראי הלא אנון כתיבין בפתגמי שמעיה נביא ועדו נביא בספר יחוס בית דוד וסדרי קרביא דהוו בין רחבעם ובין ירבעם כל יומיא׃
2Chr 12:16 ושכב רחבעם עם אבהתוי ואתקבר בקרתא דדוד ומליך אביה בריה באתרוי׃