Targum, 2 Chronicles, Chapter 28

2Chr 28:1 בר עשרין שנין אחז כד מלך ושיתסרי שנין מלך בירושלם ולא עבד דכשר קדם ייי הי כדוד אבוי׃
2Chr 28:2 ואזל באורחתהון דמלכיא דבית ישראל ואוף מתכן עבד לבעליא׃
2Chr 28:3 והוא אסיק קטרתא בחילת בר הנם ואעבר ית בנוהי באתרא ושיזיב מימרא דייי מנהון ית חזקיה מן בגלל דגלי קדם ייי דמניה אטימוסין די יפקון תלתא צדיקיא חנניה מישאל ועזריה דאטימוסין דימסרון גרמיהון דיתרמון לגו אתון נורא יקידתא מן בגלל שמא רבא ויקירא ואשתיזיבו מן יקידתא בקדמיתא אשתיזב אברהם מן יקידת אתון נורא דכשדאי דטלקיה תמן נמרוד מן בגלל דלא פלח לטעותיה ובתנייתא אשתיזיבת תמר מן יקידת נורא דבית דיניה דיהודה כד אמר אפקוהא ותתוקד בתליתיתא אשתוזב מן יקידת נורא חזקיהו בר יותם בזמן דטלקיה אבוי בחילת בר הנם בבמסייה דתופת ברביעיתא אשתיזבו חנניה מישאל ועזריה מן אתון נורא יקידתא דנבוכד נצר מלכא דבבל בחמישיתא אשתיזב יהושע בר יהוצדק כהנא רבא כד טלקיה נבוכד נצר רשיעא באתון נורא יקידתא עם אחאב בר קוליה וצדקיה בר מעשיה נביאי שקרא והנון אתוקדו בנורא ויהושע בר יהוצדק אשתיזב מטול זכוותיה ברם אחז ארשע הי כתועבת עממיא דתריך ייי מן קדם בני ישראל׃
2Chr 28:4 ודבח ואסיק בוסמין בבמסיא ועל גלימתא ותחות כל אילן עבוף׃
2Chr 28:5 ומסריה ייי אלהיה בידא דמלכא דארם וקטלו במשרייתיה ושבו מניה שבייתא רבתא ואיתיאו לדרמשק ולחוד ביד מלכא דישראל אתמסר וקטל במשרייתיה קטלא רבתא׃
2Chr 28:6 וקטל פקח בר רמליהו באנש יהודה מאה ועשרין אלפין ביומא חד כולהון בני חילא מן בגלל דשבקו ית דחלתא דייי אלהא דאבהתהון׃
2Chr 28:7 וקטל זכרי גברא דבית אפרים ית מעשיהו בר מלכא וית עזרוקם ארכון דממנא על פלטירין וית אלקנה ארקבטא דמלכא׃
2Chr 28:8 ושבו בני ישראל מאחוהון מאתן אלפין נשין בנין ובנן ואוף עדי סגיא בזו מנהון ואיתיאו ית עדאה לשמרון׃
2Chr 28:9 ותמן הוה נביא דייי עדד שמיה ונפק קדם חילא דאתא לשמרון ואמר להון הא ברוגזא דייי אלהא דאבהתכון על אנש יהודה מסרנון בידיכון וקטילתון בהון ברוגזא דעד צית שמיא מטא׃
2Chr 28:10 וכדון בני יהודה וירושלם אתון אמרין למכבש לעבדין ולאמהן לכון הלא לחוד אתון עמכון קרבן אשמין אתחייביון לקרבא קדם ייי אלהכון׃
2Chr 28:11 וכדון קבילו מני ואתיבו ית שבייתא די שביתון מאחוכון ארום תקיף רוגזא דייי עליכון׃
2Chr 28:12 וקמו גברין מרישי בני אפרים עזריהו בר יהוחנן בר ברכיהו בר משלמות ויחזקיהו בר שלום ועמשא בר חדלי על דאתיין מן חילא׃
2Chr 28:13 ואמרו להון לא תייתון ית שבייתא הכא ארום לחייבא קדם ייי יתנא לאייתא רגוז עלנא אתון אמרין לאוספא עלנא על סורחננא ועל חובתנא ארום סגיאת חובתנא לנא ותקוף רוגזא על ישראל׃
2Chr 28:14 ושבקו מזרזי חילא ית שבייתא וית בזתא קדם רבניא וכל קהלא׃
2Chr 28:15 וקמו גובריא דאתפרשו בשמהן ואתקיפו בשביתא וכל ערטיליהון אלבישו מן עדאה ואלבישונון ואנעילונון ואוכלונון ואשקיאונון ואסחיאונון ודברונון בחמרין לכל דאתקל ואייתיאונון ליריחו קרתא דדקליא קבל אחוהון ותבו לשמרון׃
2Chr 28:16 בעדנא ההיא שדר מלכא אחז למלכא דאתור למסעד ליה׃
2Chr 28:17 ותוב אדומאי אתו וקטלו מן יהודה ושבו שביתא׃
2Chr 28:18 ופלשתאי אתנגידו בקרוי שפילתא ודרומא די לשיבט יהודה וכבשו ית בית שמש וית אילון וית גדרות וית סוכו ופרוילהא וית תמנה וית פרוילהא וית גמזו וית פרוילהא ויתיבו תמן׃
2Chr 28:19 ארום אמאיך ייי ית יהודה מן בגלל אחז מלכא דיהודה ארום אתבטילו דבית יהודה מפולחנא דייי ושקרו שקר במימרא דייי׃
2Chr 28:20 ואמר עלוי תגלת פלנאסר מלכא דאתור ואעיק עלוי ולא תקפיה׃
2Chr 28:21 מטול דפליג אחז ית בית מקדשא דייי וית בית מלכא ורברביא ויהב למלכא דאתור ולא למסעד ליה׃
2Chr 28:22 ובעדן דעאק ליה ואוסיף לשקרא במימרא דייי הוא מלכא אחז׃
2Chr 28:23 ודבח לטעות דרמשק דקטילו בחילוותיה ואמר ארום טעות מלכי ארם אנון מסעדין יתהון להון אדבח ויסעדונני ואנון הוו ליה לתקלותיה ולכל ישראל׃
2Chr 28:24 וכנש אחז ית כל מאני בית מקדשא דייי וקטע ית מאני בית מקדשא דייי ואחד ית דשי בית מקדשא דייי ועבד ליה אגורין בכל זוית בירושלם׃
2Chr 28:25 ובכל קרי וקרי לשיבט יהודה עבד בימוסין לאסקא בוסמין לטעוות עממין נוכראין וארגיז קדם ייי אלהא דאבהתוי׃
2Chr 28:26 ושאר פתגמוי וכל ארחתיה קדמאי ובתראי הא אנון כתיבין על ספר מלכיא דבית יהודה וישראל׃
2Chr 28:27 ושכיב אחז עם אבהתוי וקברוהי בקרתא דירושלם ארום לא איתיוהי לקברי מלכיא דבית ישראל ומלך חזקיה בריה תחותוי׃