Ps 132:1 שירא דאתאמר על מסוקיין דתהומא אידכר יהוה לדוד ית כל סיגופיה׃
Ps 132:2 די קיים קדם יהוה נדר לתקיפא דיעקב׃
Ps 132:3 אין איעול על אתתי אין אסיק על דרגש מצעי׃
Ps 132:4 אין אתן דומכא לעיני לתימורי ניומתא׃
Ps 132:5 עד דאשכח אתר למיבני בית מקדשא דיהוה משכניא לתקיפא דיעקב׃
Ps 132:6 הא שמענא יתה באפרת אשכחנוהא בחקל חורשי לבנן אתר דצליאו אבהת עלמא׃
Ps 132:7 ניעול למשכנוי נסגוד לכיבשא דרגלוי׃
Ps 132:8 קום יהוה שרי בבית מישרוי נייחך את וארון די ביה אוריתך׃
Ps 132:9 כהנייך ילבשון לבושין דזכו וליואי חסידיך ישבחון על קורבנייא׃
Ps 132:10 מטול זכותיה דדוד עבדך במיעל ארונא במצע תרעיא לא תתיב אפי שלמה משיחך׃
Ps 132:11 קיים יהוה לדוד בקושטא לא יתוב מינה מן וולדא דמעך אשוי מליך על כורסי די לך׃
Ps 132:12 אין נטרין בנך קיימי וסהידותי דנן דאאליפינון אף״אוף#1#״ בניהון לעלמין יתבון על כורסי די לך׃
Ps 132:13 ארום איתרעי יהוה בציון רגרג״רגיג#1#״ יתה למותב די ליה׃
Ps 132:14 דא נייח שכינתי עד עלמא כא אתיב ארום רגיגתה׃
Ps 132:15 זוודה מברכא אבריך וחשוכהא יסבעון לחמא׃
Ps 132:16 וכהניהא אלביש לבושי פורקן וחסידהא משבחא ישבחון׃
Ps 132:17 תמן אצמח מליך יקיר לבית דוד סדרית שרגא למשיחי׃
Ps 132:18 בעלי דבבוי אלביש לבושין דבהתא ועלוי״ועילויה#1#״ יניץ כליליה׃