Isa 41:1 אַצִיתוּ לְמֵימְרִי נְגָוָון וֻמַלכְוָן יוֹסְפָן חֵיל יִתקָרְבוּן בְכֵין יְמַלְלוּן כַחדָא לְדִינָא נִתקָרַב׃
Isa 41:2 מַן אַיתִי בִגלַי מִמַדנְחָא אַברָהָם בְחִיר צִדקָא בִקשוֹט קָרְבֵיה לְאַתרֵיה מְסַר קְֹדָמוֹהִי עַמְמִין וֻמַלכִין תַבַר רְמָא כְעַפרָא קְטִילִין קְֹדָם חַרבֵיה כְקַשָא רְדַפִנוּן קְֹדָם קַשתֵיה׃
Isa 41:3 רְדַפִינוּן עְדָא שְלָם חִילַת אוֹרַח בְרַגלוֹהִי לָא עְלָת״עַלַת#3#״׃
Isa 41:4 מַן אְמַר אִלֵין קַייָם אָמַר וְעָבֵיד דְסַדַר דָרַיָא מִלְקַדמִין אְנָא יוי בְרֵית עָלְמָא מִבְרֵישִית אַף עָלְמֵי עָלְמַיָא דִילִי אִנוּן וֻבָר מִנִי לֵית אְלָה׃
Isa 41:5 חְזוֹ נְגָוָתָא וְיִדחְלוּן דְבִסיָפֵי אַרעָא יְזוּעוּן יִתקָרְבוּן וְייֵתוֹן׃
Isa 41:6 גְבַר יָת חַברֵיה יְסַעְדוּן וֻלאְחוּהִי יֵימַר תְקַף׃
Isa 41:7 הְלָא יִבַהתוּן בְעוֹבָדֵיהוֹן דִמתַקֵיף נַגָרָא עִם קֵינָאָה מָחֵי בְפַטִישָא עִם דִמטַפַח בְקֻרנָסָא זִמנָא אָמַר עַל דִבקָא תָקֵין הוּא וֻמתַקֵיף לֵיה בְמַסמְרִין דְלָא יִצטְלֵי׃
Isa 41:8 וְאַת ישׂרָאֵל עַבדִי יַעְקֹב דְאִתרְעִיתִי בָך זַרעֵיה דְאַברָהָם רָחְמִי׃
Isa 41:9 דְקָרֵיבתָך מִזַרעְיָת אַרעָא וֻמִמַלכְוָתָא בְחַרתָך וַאְמַרִית לָך עַבדִי אַת אִתרְעִיתִי בָך וְלָא אְרַחְקִינָך׃
Isa 41:10 לָא תִדחַל אְרֵי בְסַעְדָך מֵימְרִי לָא תִיתְבַר אְרֵי אְנָא אְלָהָך אְתַקְפִינָך אַף אְסַעְדִינָך אַף אַחְדִינָך בִימִין קוּשטִי׃
Isa 41:11 הָא יִבַהתוּן וְיִתכַנעוּן כָל עַמְמַיָא דַהְווֹ מִתגָרַן בָך יְהוֹן כְלָמָא וְיֵיבְדוּן אְנָש דִינָך׃
Isa 41:12 תִבעֵינוּן וְלָא תַשכְחִינוּן לַאְנָש מַצוּתָך יְהוֹן כְלָמָא וֻכלָא מִדָעַם גוּברִין דַהְווֹ מִתגָרַן לְמַעְבַד עִמָך קְרָב׃
Isa 41:13 אְרֵי אְנָא יוי אְלָהָך מְתַקֵיף יַמִינָך דַאְמַרִית לָך לָא תִדחַל מֵימְרִי בְסַעְדָך׃
Isa 41:14 לָא תִדחְלוּן שִבטַיָא דְבֵית יַעְקֹב זַרעְיָתָא דְבֵית יִשׂרָאֵל מֵימְרִי בְסַעדְכוֹן אְמַר יוי וֻפָרִיקְכוֹן קַדִישָא דְיִשׂרָאֵל׃
Isa 41:15 הָא שַוִיתְכוֹן לְמוֹרַג תַקִיף חְדַת מְלֵי סַמפֵיריָן תְקַטֵיל בְעַמְמַיָא״עַמְמַיָא#2#״ וֻתשֵיצֵי וֻמַלכְוָותָא כְמוֹצָא תְשַוֵי׃
Isa 41:16 תִדרֵינוּן וְרוּחָא תִטוֹלִנוּן וֻמֵימְרֵיה כְעַלעוּלָא לְקַשָא יְבַדַר יָתְהוֹן וְאַת תְבוּעַ בְמֵימְרָא דַיוי בְקַדִישָא דְיִשׂרָאֵל תִשתַבַח׃
Isa 41:17 עִנוְתָנַיָא וְחַשִיכַיָא דִמחַמְדִין לְאֻלפָנָא הָא כְצָהְיָא לְמַיָא וְלָא מַשכְחִין רוּחְהוֹן בְסִגוּפָא מְשַלהְיָא אְנָא יוי אְקַבֵיל צַלוֹתְהוֹן אְלָהָא דְיִשׂרָאֵל לָא אְרַחֵיקִנוּן׃
Isa 41:18 אְקָרֵיב גָלְוָותְהוֹן מִבֵינֵי עַמְמַיָא וַאְדַבְרִינוּן״וַאְבדְרִינוּן#2#״ בְאוֹרַח תָקְנָא וְאַפתַח לְהוֹן עַל נִגדִין נַהרִין וֻבגוֹ מֵישְרִין מַבוּעִין אְשַוֵי מַדבְרָא לַאְגַמִין דְמַיִין וַאְרַע בֵית צַהוָנָא לְמַבוּעֵי מַיָא׃
Isa 41:19 אַתֵין בְמַדבְרָא אַרזִין שִטִין וַהְדַסִין וְאָעִין דִמשַח אְרַבֵי בְמֵישְרָא בֵירָווָן מוֹרָניָן וְאַשכְרָעִין כַחדָא׃
Isa 41:20 בְדִיל דְיִחזוֹן וְיִדְעוּן וִישַווֹן יָת״#2#״ דַחלְתִי עַל לִיבְהוֹן וְיִסתַכְלוּן כַחדָא אְרֵי גְבוּרְתָא דַיוי עְבַדַת דָא וְקַדִישָא דְיִשׂרָאֵל בְרָא יָתַה׃
Isa 41:21 קָרַבוּ דִינְכוֹן אְמַר יוי אַעִילוּ חָזיָתְכוֹן אְמַר מַלכֵיה דְיַעְקֹב׃
Isa 41:22 יִתקָרְבוּן וִיחַווֹן לַנָא יָת דִיעָרְעִינַנָא קַדמַיָתָא מָא אִנִין חַווֹ וֻנשַוֵי לִבַנָא וְנִידַע סוֹפְהוֹן אוֹ דַעְתִידָן לְמֵיתֵי בַסְרוּנָא׃
Isa 41:23 חַווֹ דְאָתיָן לְסוֹפָא אִם לְטָעְוָון דְאִית בְהֵין צְרוֹך אַתוּן פָלְחִין אִם יָכְלָן אִנִין לְאֵיטָבָא וֻלאַבאָשָא וְנִסתַכַל וֻנדִין כַחדָא׃
Isa 41:24 הָא אַתוּן לָמָא וְעוֹבָדֵיכוֹן לָא מִדָעַם תוֹעֵיבָא דְאִתרְעִיתוּן לְכוֹן׃
Isa 41:25 אַיתִי בִגלַאי מַלַך דְתַקִיף כְרוּחַ צִיפוּנָא וְיֵיתֵי כְמִפַק שִמשָא בִגבוּרְתֵיה מִמַדנְחָא אְגַבְרִנֵיה בִשמִי וְיֵיתֵי וִידוּש שִלטוֹנֵי עַמְמַיָא כְמָא דְדָיְשִין יָת עַפרָא וֻכפַחָרָא דְעָרֵיך יָת טִינָא׃
Isa 41:26 מַן חַוִי מִן אַולָא וְנִידַע וֻמִלְקַדמִין וְנֵימַר קְשוֹט אַף לֵית דִמחַוֵי אַף לֵית דִמבַסַר אַף לֵית דְשָמַע לְמִלֵיכוֹן׃
Isa 41:27 פִתגָמֵי נַחָמָתָא דְאִתנַבִיוּ נְבִיַיָא מִלְקַדמִין עַל צִיוֹן הָא אְתוֹ וְלִירוּשלַם מְבַסַר אַתֵן׃
Isa 41:28 וֻגלֵי קְֹדָמַי וְלֵית גְבַר דְלֵיה עוּבָדִין טָבִין וֻמֵאִלֵין וְלֵית דְמָלֵיך מֵילַך וֻשאֵילתִינוּן אִם יָתִיבוּן פִתגָם׃
Isa 41:29 הָא כוּלְהוֹן לָמָא וְלָא מִדָעַם עוּבָדֵיהוֹן בִזָא וֻתבָרָא עַשתוֹנֵיהוֹן׃