Ezek 17:1 וַהֲוָה פִתגָם נְבוּאָה מִן קְֹדָם יוי עִמִי״עלי#3#״ לְמֵימַר׃
Ezek 17:2 בַר אָדָם חוֹד חוּדִיתָא וֻמתוֹל מַתלָא עַל בֵית יִשרָאֵל׃
Ezek 17:3 וְתֵימַר כִדְנָן אֲמַר יוי אֲלֹהִים נִשרָא רַבָא רַב גַפִין אֲרִיך אַברִין חָפֵי כַנפִין דְלֵיה צִיוּרִין אֲתָא לְלִבנָן וֻנסֵיב יָת עוֹבַרתָא דְאַרזָא רָמָא׃
Ezek 17:4 יָת רֵיש שֵיבָשתֵיה נְסֵיב וְאוֹבְלֵיה לְאַרעָא דְבָטְלָא מִפֻלחַנָא בְאַרעָא דִכנַעַן עַד לָא יֵיעֲלוּן לֵיה״בַה#3#״ בֵית יִשרָאֵל בְקִריַת תַגָרִין שַויֵיה׃
Ezek 17:5 וֻנסֵיב מִזַרעָא דְאַרעָא וְיַהבֵיה בַחֲקַל טָב לְמִזרַע נִצבֵיה עַל מַיִין סַגִיאִין גַפַן נִסבָא״נצבא#3#״נַסכָה#3#״ שַויֵיה׃
Ezek 17:6 וֻצמַח וַהֲוָה לִגפַן תַקִיף מַכִיך בְקוֹמָה לְכָפָפָא עוֹבְרָתֵיה לֵיה וְשֻרשוֹהִי תְחוֹתוֹהִי יְהוֹן וַהֲוָה לִגפַן וַעֲבַד שִבקִין״שיבשין#3#״ וֻשלַח עוֹבְרָן׃
Ezek 17:7 וַהֲוָה נִשרָא חַד רַבָא רַב גַפִין וְחָפֵי כַנפִין וְהָא גוּפנָא הָדָא כְפָת שוּרשַהָא עֲלוֹהִי וְעוֹבְרָתֵיה שְלַחַת לֵיה לְאַשקָאָה יָתַה מֵעוֹגִית נִצבְתַה׃
Ezek 17:8 בַחֲקַל טָב עַל מַיִין סַגִיאִין הִיא שְתִילָא לְמַעֲבַד עֲנַף וֻלמִטעַן פֵירִין לְמִהוֵי לִגפַן״פַגלִן#3#״ תַקִיף׃
Ezek 17:9 אֵימַר כִדנָן אֲמַר יוי אֲלֹהִים תַצלַח הֲלָא יָת שוּרשַה יְפַסִיק וְיָת אִבַה יְקַטֵיף וְיִיבְשוּן כָל טַרפֵי צִמחַה וְיִתְרוּן וְלָא בְמַשרְיָן סַגִיאָן וֻבעַם סַגִי יֵיתוֹן לְמִעקַר יָתַה מִשוּרשַהַא׃
Ezek 17:10 וְהָא שְתִילָא הֲתִצלַח הֲלָא כְמִקרַב בַה רוּחַ קִדוּמָא תִיבַש מִיבָש עַל עוֹגִית נִצבְתַה תֵיבַש׃
Ezek 17:11 וַהֲוָה פִתגָם נְבוּאָה מִן קְֹדָם יוי עִמִי״עלי#3#״ לְמֵימַר׃
Ezek 17:12 אֵימַר כְעַן לְעַמָא סַרְבָנָא הֲלָא יָדְעִיתוּן מָא אִלֵין אֵימַר הָא אֲתָא מַלכָא דְבָבַל לִירוּשלַם וֻדבַר יָת מַלכַה וְיָת רַברְבַהָא וְאוֹבֵיל יָתְהוֹן לְוָתֵיה לְבָבַל׃
Ezek 17:13 וְדבַר מִזַרעָא דְמַלכוּתָא וֻגזַר עִמֵיה קְיָם וְאַעֵיל יָתֵיה בְמוֹמֵי וְיָת רַברְבֵי אַרעָא דְבַר׃
Ezek 17:14 לְמִהוֵי מַלכוּ חַלָשָא בְדִיל דְלָא לְאִתרַברָבָא לְמִיטַר יָת קְיָמֵיה לְמִפלְחֵיה׃
Ezek 17:15 וֻמרֵיד בֵיה לְשַלָחָא אִזגַדוֹהִי״איסגדוהי#3#״ לְמִצרַיִם לְמִיתַן לֵיה סוּסָוָן וְעַם סַגִי הֲיִצלַח הֲיִשתֵיזַב דְעָבֵיד אִילֵין וֻמשַנֵי קְיַם הֲיִשתֵיזַב׃
Ezek 17:16 קַיָים אֲנָא אֲמַר יוי אֲלֹהִים אִם לָא בְאַתרָא דְמַלכָא דְאַמלֵיך יָתֵיה דְבַסַר עַל מוֹמָתֵיה וֻדאַשנִי יָת קְיָמֵיה עִמֵיה בְגוֹ בָבַל יְמוּת׃
Ezek 17:17 וְלָא בְמַשרְיָן סַגִיאָן וֻבעַם סַגִי יַעֲבֵיד עִמֵיה פַרעֹה קְרָב בְמִצבַר מִלֵיתָא וֻבמִבנֵי כַרקוֹם לְשֵיצָאָה מְדִינָן סַגִיאָן׃
Ezek 17:18 וֻבַסַר עַל מוֹמֵי לְאַשנָאָה קְיָם וְהָא אַמטִי יְדֵיה לְפַרעֹה וְכָל אִלֵין עֲבַד לָא יִשתֵיזַב׃
Ezek 17:19 בְכֵין כִדְנָן אֲמַר יוי אֲלֹהִים קַיָים אֲנָא אִם לָא מוֹמָתִי דְבַסַר וֻקיָמִי דְאַשנִי וְאַתֵין פוֹרעָנוּת אוֹרחֵיה בְרֵישֵיה׃
Ezek 17:20 וְאַפרוֹס עֲלוֹהִי מְצָדְתִי וְיִתאֲחַד בִסרִיגְתִי וְאַגלֵינֵיה לְבָבַל וְאַתפְרַע מִנֵיה תַמָן שִקרֵיה דְשַקַר קְֹדָמַי״בי#3#״׃
Ezek 17:21 וְיָת כָל גִבָרוֹהִי בְכָל מַשרְיָתֵיה בְחַרבָא יִתקַטלוּן וֻדיִשתַאֲרוּן לְכָל רוּחַ יִתבַדְרוּן וְתִידְעוּן אֲרֵי אֲנָא יוי גְזַרִית בְמֵימְרִי׃
Ezek 17:22 כִדנָן אֲמַר יוי אֲלֹהִים וַאֲקְרֵיב אֲנָא מִמַלכוּתָא דְבֵית דָוִיד דִמתִיל בְאַרזָא רָמָא וַאֲקַיְימִנֵיה מִבְנֵי בְנוֹהִי יָנֵיק אֲרַבֵי וַאֲקַיְימִנֵיה בְמֵימְרִי כְטוּר רָם וֻמנַטַל׃
Ezek 17:23 בְטוּר קוּדשָא דְיִשרָאֵל אֲקַיְמִנֵיה וִיכַנֵיש מַשרְיָן וְיַעֲבֵיד סוּמכָוָן וִיהֵי לְמַלַך תַקִיף וְיִסתַמכוּן עֲלוֹהִי כָל צַדִיקַיָא וְכָל עִנוְתָנַיָא בִטלַל מַלכוּתֵיה יִשרוֹן׃
Ezek 17:24 וְיִדְעוּן כָל מַלכֵי עַמְמַיָא אֲרֵי אְנָא יוי אַמאֵיכִית מַלכוּת דַהֲוָת תַקִיפָא תַקֵיפִית מַלכוּתָא דַהְוָת חַלָשָא אַמאֵיכִית מַלכוּת עַמְמַיָא דְהֲוָת תַקִיפָא כְאָע רַטִיב וְתַקֵיפִית מַלכוּת בֵית יִשרָאֵל דַהֲוָת חַלָשָא כְאָע יַבִיש אֲנָא יוי גְזַרִית בְמֵימְרִי וַאֲקַיֵים׃