Gen 15:2 ב ויאמר אברם אדני יהוה מה תתן לי ואנכי הולך ערירי ובן משק ביתי הוא דמשק אליעזר
Gen 15:3 ג ויאמר אברם--הן לי לא נתתה זרע והנה בן ביתי יורש אתי
Gen 15:4 ד והנה דבר יהוה אליו לאמר לא יירשך זה כי אם אשר יצא ממעיך הוא יירשך
Gen 15:5 ה ויוצא אתו החוצה ויאמר הבט נא השמימה וספר הכוכבים--אם תוכל לספר אתם ויאמר לו כה יהיה זרעך
Gen 15:6 ו והאמן ביהוה ויחשבה לו צדקה
Gen 15:7 ז ויאמר אליו אני יהוה אשר הוצאתיך מאור כשדים--לתת לך את הארץ הזאת לרשתה
Gen 15:8 ח ויאמר אדני יהוה במה אדע כי אירשנה
Gen 15:9 ט ויאמר אליו קחה לי עגלה משלשת ועז משלשת ואיל משלש ותר וגוזל
Gen 15:10 י ויקח לו את כל אלה ויבתר אתם בתוך ויתן איש בתרו לקראת רעהו ואת הצפר לא בתר
Gen 15:11 יא וירד העיט על הפגרים וישב אתם אברם
Gen 15:12 יב ויהי השמש לבוא ותרדמה נפלה על אברם והנה אימה חשכה גדלה נפלת עליו
Gen 15:13 יג ויאמר לאברם ידע תדע כי גר יהיה זרעך בארץ לא להם ועבדום וענו אתם--ארבע מאות שנה
Gen 15:14 יד וגם את הגוי אשר יעבדו דן אנכי ואחרי כן יצאו ברכש גדול
Gen 15:15 טו ואתה תבוא אל אבתיך בשלום תקבר בשיבה טובה
Gen 15:16 טז ודור רביעי ישובו הנה כי לא שלם עון האמרי עד הנה
Gen 15:17 יז ויהי השמש באה ועלטה היה והנה תנור עשן ולפיד אש אשר עבר בין הגזרים האלה
Gen 15:18 יח ביום ההוא כרת יהוה את אברם--ברית לאמר לזרעך נתתי את הארץ הזאת מנהר מצרים עד הנהר הגדל נהר פרת
Gen 15:19 יט את הקיני ואת הקנזי ואת הקדמני
Gen 15:20 כ ואת החתי ואת הפרזי ואת הרפאים
Gen 15:21 כא ואת האמרי ואת הכנעני ואת הגרגשי ואת היבוסי {ס}
Previous
List