Allepo, Genesis, Chapter 17

Gen 17:1 א ויהי אברם בן תשעים שנה ותשע שנים וירא יהוה אל אברם ויאמר אליו אני אל שדי--התהלך לפני והיה תמים
Gen 17:2 ב ואתנה בריתי ביני ובינך וארבה אותך במאד מאד
Gen 17:3 ג ויפל אברם על פניו וידבר אתו אלהים לאמר
Gen 17:4 ד אני הנה בריתי אתך והיית לאב המון גוים
Gen 17:5 ה ולא יקרא עוד את שמך אברם והיה שמך אברהם כי אב המון גוים נתתיך
Gen 17:6 ו והפרתי אתך במאד מאד ונתתיך לגוים ומלכים ממך יצאו
Gen 17:7 ז והקמתי את בריתי ביני ובינך ובין זרעך אחריך לדרתם--לברית עולם  להיות לך לאלהים ולזרעך אחריך
Gen 17:8 ח ונתתי לך ולזרעך אחריך את ארץ מגריך את כל ארץ כנען לאחזת עולם והייתי להם לאלהים
Gen 17:9 ט ויאמר אלהים אל אברהם ואתה את בריתי תשמר--אתה וזרעך אחריך לדרתם
Gen 17:10 י זאת בריתי אשר תשמרו ביני וביניכם ובין זרעך אחריך  המול לכם כל זכר
Gen 17:11 יא ונמלתם את בשר ערלתכם והיה לאות ברית ביני וביניכם
Gen 17:12 יב ובן שמנת ימים ימול לכם כל זכר--לדרתיכם  יליד בית--ומקנת כסף מכל בן נכר אשר לא מזרעך הוא
Gen 17:13 יג המול ימול יליד ביתך ומקנת כספך והיתה בריתי בבשרכם לברית עולם
Gen 17:14 יד וערל זכר אשר לא ימול את בשר ערלתו--ונכרתה הנפש ההוא מעמיה  את בריתי הפר  {ס}
Gen 17:15 טו ויאמר אלהים אל אברהם שרי אשתך לא תקרא את שמה שרי  כי שרה שמה
Gen 17:16 טז וברכתי אתה וגם נתתי ממנה לך בן וברכתיה והיתה לגוים מלכי עמים ממנה יהיו
Gen 17:17 יז ויפל אברהם על פניו ויצחק ויאמר בלבו הלבן מאה שנה יולד ואם שרה הבת תשעים שנה תלד
Gen 17:18 יח ויאמר אברהם אל האלהים  לו ישמעאל יחיה לפניך
Gen 17:19 יט ויאמר אלהים אבל שרה אשתך ילדת לך בן וקראת את שמו יצחק והקמתי את בריתי אתו לברית עולם לזרעו אחריו
Gen 17:20 כ ולישמעאל שמעתיך--הנה ברכתי אתו והפריתי אתו והרביתי אתו במאד מאד  שנים עשר נשיאם יוליד ונתתיו לגוי גדול
Gen 17:21 כא ואת בריתי אקים את יצחק אשר תלד לך שרה למועד הזה בשנה האחרת
Gen 17:22 כב ויכל לדבר אתו ויעל אלהים מעל אברהם
Gen 17:23 כג ויקח אברהם את ישמעאל בנו ואת כל ילידי ביתו ואת כל מקנת כספו--כל זכר באנשי בית אברהם וימל את בשר ערלתם בעצם היום הזה כאשר דבר אתו אלהים
Gen 17:24 כד ואברהם--בן תשעים ותשע שנה  בהמלו בשר ערלתו
Gen 17:25 כה וישמעאל בנו בן שלש עשרה שנה  בהמלו--את בשר ערלתו
Gen 17:26 כו בעצם היום הזה נמול אברהם וישמעאל בנו
Gen 17:27 כז וכל אנשי ביתו יליד בית ומקנת כסף מאת בן נכר--נמלו אתו  {פ}