Allepo, Genesis, Chapter 49

Gen 49:1 א ויקרא יעקב אל בניו ויאמר האספו ואגידה לכם את אשר יקרא אתכם באחרית הימים
Gen 49:2 ב הקבצו ושמעו בני יעקב ושמעו אל ישראל אביכם
Gen 49:3 ג ראובן בכרי אתה כחי וראשית אוני--יתר שאת ויתר עז
Gen 49:4 ד פחז כמים אל תותר כי עלית משכבי אביך אז חללת יצועי עלה  {פ}
Gen 49:5 ה שמעון ולוי אחים--כלי חמס מכרתיהם
Gen 49:6 ו בסדם אל תבא נפשי בקהלם אל תחד כבדי  כי באפם הרגו איש וברצנם עקרו שור
Gen 49:7 ז ארור אפם כי עז ועברתם כי קשתה אחלקם ביעקב ואפיצם בישראל  {פ}
Gen 49:8 ח יהודה אתה יודוך אחיך--ידך בערף איביך ישתחוו לך בני אביך
Gen 49:9 ט גור אריה יהודה מטרף בני עלית כרע רבץ כאריה וכלביא מי יקימנו
Gen 49:10 י לא יסור שבט מיהודה ומחקק מבין רגליו עד כי יבא שילה ולו יקהת עמים
Gen 49:11 יא אסרי לגפן עירה ולשרקה בני אתנו כבס ביין לבשו ובדם ענבים סותה
Gen 49:12 יב חכלילי עינים מיין ולבן שנים מחלב  {פ}
Gen 49:13 יג זבולן לחוף ימים ישכן והוא לחוף אנית וירכתו על צידן  {פ}
Gen 49:14 יד יששכר חמר גרם--רבץ בין המשפתים
Gen 49:15 טו וירא מנחה כי טוב ואת הארץ כי נעמה ויט שכמו לסבל ויהי למס עבד  {ס}
Gen 49:16 טז דן ידין עמו--כאחד שבטי ישראל
Gen 49:17 יז יהי דן נחש עלי דרך שפיפן עלי ארח--הנשך עקבי סוס ויפל רכבו אחור
Gen 49:18 יח לישועתך קויתי יהוה  {ס}
Gen 49:19 יט גד גדוד יגודנו והוא יגד עקב  {ס}
Gen 49:20 כ מאשר שמנה לחמו והוא יתן מעדני מלך  {ס}
Gen 49:21 כא נפתלי אילה שלחה--הנתן אמרי שפר  {ס}
Gen 49:22 כב בן פרת יוסף בן פרת עלי עין בנות צעדה עלי שור
Gen 49:23 כג וימררהו ורבו וישטמהו בעלי חצים
Gen 49:24 כד ותשב באיתן קשתו ויפזו זרעי ידיו מידי אביר יעקב משם רעה אבן ישראל
Gen 49:25 כה מאל אביך ויעזרך ואת שדי ויברכך ברכת שמים מעל ברכת תהום רבצת תחת ברכת שדים ורחם
Gen 49:26 כו ברכת אביך גברו על ברכת הורי עד תאות גבעת עולם תהיין לראש יוסף ולקדקד נזיר אחיו  {פ}
Gen 49:27 כז בנימין זאב יטרף בבקר יאכל עד ולערב יחלק שלל
Gen 49:28 כח כל אלה שבטי ישראל שנים עשר וזאת אשר דבר להם אביהם ויברך אותם--איש אשר כברכתו ברך אתם
Gen 49:29 כט ויצו אותם ויאמר אלהם אני נאסף אל עמי--קברו אתי אל אבתי  אל המערה--אשר בשדה עפרון החתי
Gen 49:30 ל במערה אשר בשדה המכפלה אשר על פני ממרא--בארץ כנען  אשר קנה אברהם את השדה מאת עפרן החתי--לאחזת קבר
Gen 49:31 לא שמה קברו את אברהם ואת שרה אשתו שמה קברו את יצחק ואת רבקה אשתו ושמה קברתי את לאה
Gen 49:32 לב מקנה השדה והמערה אשר בו מאת בני חת
Gen 49:33 לג ויכל יעקב לצות את בניו ויאסף רגליו אל המטה ויגוע ויאסף אל עמיו