Job 36:1 א                  ויסף אליהוא ויאמר
Job 36:2 ב  כתר-לי זעיר ואחוך    כי עוד לאלוה מלים
Job 36:3 ג  אשא דעי למרחוק    ולפעלי אתן-צדק
Job 36:4 ד  כי-אמנם לא-שקר מלי    תמים דעות עמך
Job 36:5 ה  הן-אל כביר ולא ימאס    כביר כח לב
Job 36:6 ו  לא-יחיה רשע    ומשפט עניים יתן
Job 36:7 ז  לא-יגרע מצדיק    עיניו ואת-מלכים לכסא    וישיבם לנצח ויגבהו
Job 36:8 ח  ואם-אסורים בזקים    ילכדון בחבלי-עני
Job 36:9 ט  ויגד להם פעלם    ופשעיהם כי יתגברו
Job 36:10 י  ויגל אזנם למוסר    ויאמר כי-ישובון מאון
Job 36:11 יא  אם-ישמעו ויעבדו    יכלו ימיהם בטוב ושניהם בנעימים
Job 36:12 יב  ואם-לא ישמעו בשלח יעברו    ויגועו בבלי-דעת
Job 36:13 יג  וחנפי-לב ישימו אף    לא ישועו כי אסרם
Job 36:14 יד  תמת בנער נפשם    וחיתם בקדשים
Job 36:15 טו  יחלץ עני בעניו    ויגל בלחץ אזנם
Job 36:16 טז  ואף הסיתך מפי-צר--    רחב לא-מוצק תחתיה ונחת שלחנך    מלא דשן
Job 36:17 יז  ודין-רשע מלאת    דין ומשפט יתמכו
Job 36:18 יח  כי-חמה פן-יסיתך בספק    ורב-כפר אל-יטך
Job 36:19 יט  היערך שועך לא בצר    וכל מאמצי-כח
Job 36:20 כ  אל-תשאף הלילה--    לעלות עמים תחתם
Job 36:21 כא  השמר אל-תפן אל-און    כי-על-זה בחרת מעני
Job 36:22 כב  הן-אל ישגיב בכחו    מי כמהו מורה
Job 36:23 כג  מי-פקד עליו דרכו    ומי-אמר פעלת עולה
Job 36:24 כד  זכר כי-תשגיא פעלו--    אשר שררו אנשים
Job 36:25 כה  כל-אדם חזו-בו    אנוש יביט מרחוק
Job 36:26 כו  הן-אל שגיא ולא נדע    מספר שניו ולא-חקר
Job 36:27 כז  כי יגרע נטפי-מים    יזקו מטר לאדו
Job 36:28 כח  אשר-יזלו שחקים    ירעפו עלי אדם רב
Job 36:29 כט  אף אם-יבין מפרשי-עב    תשאות סכתו
Job 36:30 ל  הן-פרש עליו אורו    ושרשי הים כסה
Job 36:31 לא  כי-בם ידין עמים    יתן-אכל למכביר
Job 36:32 לב  על-כפים כסה-אור    ויצו עליה במפגיע
Job 36:33 לג  יגיד עליו רעו    מקנה אף על-עולה