Psa 7:1 א  שגיון לדוד    אשר-שר ליהוה--על-דברי-כוש בן-ימיני
Psa 7:2 ב  יהוה אלהי בך חסיתי    הושיעני מכל-רדפי והצילני
Psa 7:3 ג  פן-יטרף כאריה נפשי    פרק ואין מציל
Psa 7:4 ד  יהוה אלהי אם-עשיתי זאת    אם-יש-עול בכפי
Psa 7:5 ה  אם-גמלתי שולמי רע    ואחלצה צוררי ריקם
Psa 7:6 ו  ירדף אויב נפשי וישג--וירמס לארץ חיי    וכבודי לעפר ישכן סלה
Psa 7:7 ז  קומה יהוה באפך--הנשא בעברות צוררי    ועורה אלי משפט צוית
Psa 7:8 ח  ועדת לאמים תסובבך    ועליה למרום שובה
Psa 7:9 ט  יהוה ידין עמים    שפטני יהוה כצדקי וכתמי עלי
Psa 7:10 י  יגמר נא רע רשעים--    ותכונן צדיק ובחן לבות וכליות--    אלהים צדיק
Psa 7:11 יא  מגני על-אלהים    מושיע ישרי-לב
Psa 7:12 יב  אלהים שופט צדיק    ואל זעם בכל-יום
Psa 7:13 יג  אם-לא ישוב חרבו ילטוש    קשתו דרך ויכוננה
Psa 7:14 יד  ולו הכין כלי מות    חציו לדלקים יפעל
Psa 7:15 טו  הנה יחבל-און    והרה עמל וילד שקר
Psa 7:16 טז  בור כרה ויחפרהו    ויפל בשחת יפעל
Psa 7:17 יז  ישוב עמלו בראשו    ועל קדקדו חמסו ירד [ (Psalms 7:18) יח  אודה יהוה כצדקו    ואזמרה שם-יהוה עליון ]