Allepo, Psalms, Chapter 028

Psa 28:1 א  לדוד אליך יהוה אקרא--    צורי אל-תחרש ממני פן-תחשה ממני    ונמשלתי עם-יורדי בור
Psa 28:2 ב  שמע קול תחנוני    בשועי אליך בנשאי ידי    אל-דביר קדשך
Psa 28:3 ג  אל-תמשכני עם-רשעים    ועם-פעלי-און דברי שלום עם-רעיהם    ורעה בלבבם
Psa 28:4 ד  תן-להם כפעלם    וכרע מעלליהם כמעשה ידיהם תן להם    השב גמולם להם
Psa 28:5 ה  כי לא יבינו אל-פעלת יהוה--    ואל-מעשה ידיו יהרסם    ולא יבנם
Psa 28:6 ו  ברוך יהוה    כי-שמע קול תחנוני
Psa 28:7 ז  יהוה עזי ומגני--    בו בטח לבי ונעזרתי ויעלז לבי    ומשירי אהודנו
Psa 28:8 ח  יהוה עז-למו    ומעוז ישועות משיחו הוא
Psa 28:9 ט  הושיעה את-עמך--    וברך את-נחלתך ורעם ונשאם    עד-העולם