Allepo, Psalms, Chapter 032

Psa 32:1 א  לדוד משכיל    אשרי נשוי-פשע כסוי חטאה
Psa 32:2 ב  אשרי אדם--לא יחשב יהוה לו עון    ואין ברוחו רמיה
Psa 32:3 ג  כי-החרשתי בלו עצמי--    בשאגתי כל-היום
Psa 32:4 ד  כי יומם ולילה--    תכבד עלי ידך נהפך לשדי--    בחרבני קיץ סלה
Psa 32:5 ה  חטאתי אודיעך    ועוני לא-כסיתי-- אמרתי    אודה עלי פשעי ליהוה ואתה נשאת עון חטאתי    סלה
Psa 32:6 ו  על-זאת יתפלל כל-חסיד אליך--    לעת מצא רק לשטף מים רבים--    אליו לא יגיעו
Psa 32:7 ז  אתה סתר לי--    מצר תצרני רני פלט    תסובבני סלה
Psa 32:8 ח  אשכילך ואורך--בדרך-זו תלך    איעצה עליך עיני
Psa 32:9 ט  אל-תהיו כסוס כפרד--    אין הבין במתג-ורסן עדיו לבלום    בל קרב אליך
Psa 32:10 י  רבים מכאובים לרשע    והבוטח ביהוה--חסד יסובבנו
Psa 32:11 יא  שמחו ביהוה וגילו צדיקים    והרנינו כל-ישרי-לב