Psa 40:1 א  למנצח לדוד מזמור
Psa 40:2 ב  קוה קויתי יהוה    ויט אלי וישמע שועתי
Psa 40:3 ג  ויעלני מבור שאון--    מטיט היון ויקם על-סלע רגלי    כונן אשרי
Psa 40:4 ד  ויתן בפי שיר חדש--    תהלה לאלהינו יראו רבים וייראו    ויבטחו ביהוה
Psa 40:5 ה  אשרי הגבר--    אשר-שם יהוה מבטחו ולא-פנה אל-רהבים    ושטי כזב
Psa 40:6 ו  רבות עשית    אתה יהוה אלהי-- נפלאתיך ומחשבתיך    אלינו אין ערך אליך--אגידה ואדברה    עצמו מספר
Psa 40:7 ז  זבח ומנחה לא-חפצת--    אזנים כרית לי עולה וחטאה    לא שאלת
Psa 40:8 ח  אז אמרתי הנה-באתי    במגלת-ספר כתוב עלי
Psa 40:9 ט  לעשות-רצונך אלהי חפצתי    ותורתך בתוך מעי
Psa 40:10 י  בשרתי צדק בקהל רב--    הנה שפתי לא אכלא יהוה    אתה ידעת
Psa 40:11 יא  צדקתך לא-כסיתי בתוך לבי--    אמונתך ותשועתך אמרתי לא-כחדתי חסדך ואמתך    לקהל רב
Psa 40:12 יב  אתה יהוה--    לא-תכלא רחמיך ממני חסדך ואמתך    תמיד יצרוני
Psa 40:13 יג  כי אפפו-עלי רעות    עד-אין מספר-- השיגוני עונתי    ולא-יכלתי לראות עצמו משערות ראשי    ולבי עזבני
Psa 40:14 יד  רצה יהוה להצילני    יהוה לעזרתי חושה
Psa 40:15 טו  יבשו ויחפרו יחד--    מבקשי נפשי לספותה יסגו אחור ויכלמו--    חפצי רעתי
Psa 40:16 טז  ישמו על-עקב בשתם--    האמרים לי האח האח
Psa 40:17 יז  ישישו וישמחו בך--    כל-מבקשיך יאמרו תמיד יגדל יהוה--    אהבי תשועתך [ (Psalms 40:18) יח  ואני עני ואביון--    אדני יחשב-לי עזרתי ומפלטי אתה    אלהי אל-תאחר ]