Jer 30:1 א הדבר אשר היה אל ירמיהו מאת יהוה לאמר
Jer 30:2 ב כה אמר יהוה אלהי ישראל לאמר  כתב לך את כל הדברים אשר דברתי אליך--אל ספר
Jer 30:3 ג כי הנה ימים באים נאם יהוה ושבתי את שבות עמי ישראל ויהודה אמר יהוה והשבתים אל הארץ אשר נתתי לאבותם--וירשוה  {פ}
Jer 30:4 ד ואלה הדברים אשר דבר יהוה אל ישראל--ואל יהודה
Jer 30:5 ה כי כה אמר יהוה קול חרדה שמענו--פחד ואין שלום
Jer 30:6 ו שאלו נא וראו אם ילד זכר  מדוע ראיתי כל גבר ידיו על חלציו כיולדה ונהפכו כל פנים לירקון
Jer 30:7 ז הוי כי גדול היום ההוא--מאין כמהו ועת צרה היא ליעקב וממנה יושע
Jer 30:8 ח והיה ביום ההוא נאם יהוה צבאות אשבר עלו מעל צוארך ומוסרותיך אנתק ולא יעבדו בו עוד זרים
Jer 30:9 ט ועבדו את יהוה אלהיהם ואת דוד מלכם אשר אקים להם  {ס}
Jer 30:10 י ואתה אל תירא עבדי יעקב נאם יהוה ואל תחת ישראל--כי הנני מושיעך מרחוק ואת זרעך מארץ שבים ושב יעקב ושקט ושאנן ואין מחריד
Jer 30:11 יא כי אתך אני נאם יהוה להושיעך  כי אעשה כלה בכל הגוים אשר הפצותיך שם אך אתך לא אעשה כלה ויסרתיך למשפט ונקה לא אנקך  {פ}
Jer 30:12 יב כי כה אמר יהוה אנוש לשברך--נחלה מכתך
Jer 30:13 יג אין דן דינך למזור רפאות תעלה אין לך
Jer 30:14 יד כל מאהביך שכחוך אותך לא ידרשו  כי מכת אויב הכיתיך מוסר אכזרי--על רב עונך עצמו חטאתיך
Jer 30:15 טו מה תזעק על שברך אנוש מכאבך  על רב עונך עצמו חטאתיך--עשיתי אלה לך
Jer 30:16 טז לכן כל אכליך יאכלו וכל צריך כלם בשבי ילכו והיו שאסיך למשסה וכל בזזיך אתן לבז
Jer 30:17 יז כי אעלה ארכה לך וממכותיך ארפאך נאם יהוה  כי נדחה קראו לך--ציון היא דרש אין לה  {ס}
Jer 30:18 יח כה אמר יהוה הנני שב שבות אהלי יעקוב ומשכנתיו ארחם ונבנתה עיר על תלה וארמון על משפטו ישב
Jer 30:19 יט ויצא מהם תודה וקול משחקים והרבתים ולא ימעטו והכבדתים ולא יצערו
Jer 30:20 כ והיו בניו כקדם ועדתו לפני תכון ופקדתי על כל לחציו
Jer 30:21 כא והיה אדירו ממנו ומשלו מקרבו יצא והקרבתיו ונגש אלי  כי מי הוא זה ערב את לבו לגשת אלי--נאם יהוה
Jer 30:22 כב והייתם לי לעם ואנכי אהיה לכם לאלהים  {ס}
Jer 30:23 כג הנה סערת יהוה חמה יצאה--סער מתגורר  על ראש רשעים יחול
Jer 30:24 כד לא ישוב חרון אף יהוה עד עשתו ועד הקימו מזמות לבו באחרית הימים תתבוננו בה [ (Jeremiah 30:25) כה בעת ההיא נאם יהוה אהיה לאלהים לכל משפחות ישראל והמה יהיו לי לעם  {ס} ]