Mic 1:1 א דבר יהוה אשר היה אל מיכה המרשתי בימי יותם אחז יחזקיה מלכי יהודה--אשר חזה על שמרון וירושלם
Mic 1:2 ב שמעו עמים כלם הקשיבי ארץ ומלאה ויהי אדני יהוה בכם לעד אדני מהיכל קדשו
Mic 1:3 ג כי הנה יהוה יצא ממקומו וירד ודרך על במותי (במתי) ארץ
Mic 1:4 ד ונמסו ההרים תחתיו והעמקים יתבקעו כדונג מפני האש כמים מגרים במורד
Mic 1:5 ה בפשע יעקב כל זאת ובחטאות בית ישראל מי פשע יעקב הלוא שמרון ומי במות יהודה הלוא ירושלם
Mic 1:6 ו ושמתי שמרון לעי השדה למטעי כרם והגרתי לגי אבניה ויסדיה אגלה
Mic 1:7 ז וכל פסיליה יכתו וכל אתנניה ישרפו באש וכל עצביה אשים שממה  כי מאתנן זונה קבצה ועד אתנן זונה ישובו
Mic 1:8 ח על זאת אספדה ואילילה אילכה שילל (שולל) וערום אעשה מספד כתנים ואבל כבנות יענה
Mic 1:9 ט כי אנושה מכותיה  כי באה עד יהודה--נגע עד שער עמי עד ירושלם
Mic 1:10 י בגת אל תגידו--בכו אל תבכו בבית לעפרה עפר התפלשתי (התפלשי)
Mic 1:11 יא עברי לכם יושבת שפיר עריה בשת לא יצאה יושבת צאנן--מספד בית האצל יקח מכם עמדתו
Mic 1:12 יב כי חלה לטוב יושבת מרות  כי ירד רע מאת יהוה לשער ירושלם
Mic 1:13 יג רתם המרכבה לרכש יושבת לכיש ראשית חטאת היא לבת ציון כי בך נמצאו פשעי ישראל
Mic 1:14 יד לכן תתני שלוחים על מורשת גת בתי אכזיב לאכזב למלכי ישראל
Mic 1:15 טו עד הירש אבי לך יושבת מרשה  עד עדלם יבוא כבוד ישראל
Mic 1:16 טז קרחי וגזי על בני תענוגיך הרחבי קרחתך כנשר כי גלו ממך  {ס}