The Law of the Lord Is Perfect

Psa 19:1 (18:1) in finem psalmus David (18:2) caeli enarrant gloriam Dei et opera manuum eius adnuntiat firmamentum

Psa 19:2 (18:3) dies diei eructat verbum et nox nocti indicat scientiam

Psa 19:3 (18:4) non sunt loquellae neque sermones quorum non audiantur voces eorum

Psa 19:4 (18:5) in omnem terram exivit sonus eorum et in fines orbis terrae verba eorum

Psa 19:5 (18:6) in sole posuit tabernaculum suum et ipse tamquam sponsus procedens de thalamo suo exultavit ut gigans ad currendam viam suam;

Psa 19:6 (18:7) a summo caeli egressio eius et occursus eius usque ad summum eius nec est qui se abscondat a calore eius

Psa 19:7 (18:8) lex Domini inmaculata convertens animas testimonium Domini fidele sapientiam praestans parvulis

Psa 19:8 (18:9) iustitiae Domini rectae laetificantes corda praeceptum Domini lucidum inluminans oculos

Psa 19:9 (18:10) timor Domini sanctus permanens in saeculum saeculi iudicia Domini vera iustificata in semet ipsa

Psa 19:10 (18:11) desiderabilia super aurum et lapidem pretiosum multum et dulciora super mel et favum

Psa 19:11 (18:12) etenim servus tuus custodit ea in custodiendis illis retributio multa

Psa 19:12 (18:13) delicta quis intellegit ab occultis meis munda me

Psa 19:13 (18:14) et ab alienis parce servo tuo si mei non fuerint dominati tunc inmaculatus ero et emundabor a delicto maximo

Psa 19:14 (18:15) et erunt ut conplaceant eloquia oris mei et meditatio cordis mei in conspectu tuo semper Domine adiutor meus et redemptor meus